RSS
Velkominn á vefsíðu Landakirkju!
Heimasíðu Landakirkju er ætlað að opna aðgang að upplýsingum um þjónustuna og auðvelda þér að taka þátt í safnaðarstarfi og helgihaldi kirkjunnar. Verið hjartanlega velkomin í Landakirkju!
Fréttir og skilaboð
Safnaðarstarfið í gang, barnaguðsþjónustan, fermingarbörnin, æskulýðsfundir, barnakórinn, fatlaðir og allt
03. Sept. 2010 kl.12:19
Safnaðarstarf Landakirkju er að hefjast aftur eftir sumarið sunnudaginn 5. september með mikilli dagskrá fyrir alla hópa og söfnuðinn allan. Það er mikið um að vera í Landakirkju nær alla daga vikunnar, enda söfnuðurinn hátt í fjögur þúsund manns. Vonast prestar, sóknarnefnd og starfsfólk eftir góðri kirkjusókn í vetur og vona að hún hefjist vel þennan fyrsta sunnudag í september.
Helstu þættir í vetrarstarfinu eru barnaguðsþjónustan, fermingarfræðslan, æskulýðsfélagið, barnakórinn Litlir lærisveinar, kirkjustarf fatlaðra, krakkahópar fyrir 6-8 ára, 9-10 ára og 11-12 ára, Vinir í bata (Tólf spora andlegt ferðalag), Aglow, Kvenfélag Landakirkju og Kór Landakirkju. Kvenfélagið og Kórinn starfa allt árið en setja líka upp vetrardagskrá sem hefst núna.
Skólaguðsþjónusta - velferð nemandans
24. Agu. 2010 kl.14:54
Kennarar, starfsfólk og nemendur Grunnskólans, Framhaldsskólans og Visku eru sérstaklega hvattir til að mæta til skólaguðsþjónustu við upphaf skólaársins, sem haldin verður í Landakirkju sunnudaginn 29. ágúst kl. 11. Kennarar lesa úr Ritningunni, sr. Guðmundur Örn Jónsson þjónar fyrir altari og sr. Kristján Björnsson prédikar. Kór Landakirkju syngur og organisti er Guðmundur H. Guðjónsson.
Það er gamall og góður siður að leita til Guðs um blessun í upphafi skólaársins og er einnig beðið sérstaklega fyrir börnum og æskulýð, sem og nemendur öllum og kennaraliði í guðsþjónustunni.
Áhersla verður lögð á að ræða velferð nemandans í skólastarfinu og þá vernd sem við eigum að búa börnum samfélagsins.
Guðsþjónusta með gítarleik og léttum söng
11. Agu. 2010 kl.23:00
Guðsþjónusta sunnudagsins 15. ágúst verður með gítarleik og léttum söng. Gísli Stefánsson leikur á gítarinn undir söng Kórs Landakirkju og leiða þau safnaðarsöng. Sr. Kristján Björnsson prédikar og þjónar fyrir altari. Athugið að guðsþjónustur eru kl. 11 árdegis á sumrin og verður svo út ágústmánuð.
Fjöldi ferðamanna koma til kirkju
11. Agu. 2010 kl.22:46
Fjöldi ferðamanna sem koma í Landakirkju hefur margfaldast á liðnum dögum og vikum. Daglega koma tugir manna til að skoða kirkjuna og njóta helgi hennar. Sumir setjast inn til að eiga hljóða stund á ferðalagi sínu og finnst hún einstakur helgidómur. Má nefna að í dag, 11. ágúst rituðu 50 manns í gestabók kirkjunnar en ætla má að fjöldinn hafi verið meiri sem kom inn.
Um tíma, þegar sr. Kristján ætlaði að loka kirkjunni varð hann að hverfa frá því, enda greip jafnan nýr gestur í hurðahúninn þegar annar fór, svo dyrnar náðu varla að falla að stöfum í rúman hálftíma. Margir þessara ferðamanna voru af skemmtiferðaskipi sem lá hér við bryggju í dag, en aðrir voru víðs vegar að úr heiminum og ofan af Suðurlandi.
Prestar og aðrir starfsmenn hafa veitt þessum nýju kirkjugestum leiðsögn og svarað spurningum. Kirkjan er opin á daginn meðan prestur eða annar starsmaður er í Safnaðarheimilinu.
Ef ferðamenn vilja komast inn og kirkjan er ekki opin má hringja í vaktsíma prestanna, 488 1508 til að mæla sér mót og fá leiðsögn um sögu kirkjunnar.
Ferming við messu 8. ágúst
07. Agu. 2010 kl.10:41
Fermt verður við messu sunnudaginn 8. ágúst kl. 11. Fermingarbörnin eru tvö systkin frá Berghem í Hollandi, Ívar og Sara Kristín, börn Tómasar Helgasonar og Jóhönnu Helenu Helgason. Kór Landakirkju syngur. Organisti er Guðmundur Hafliði Guðjónsson. Sr. Kristján Björnsson þjónar fyrir altari og prédikar, en fermingarbörnin lesa úr Ritningunni á hollensku. Allir eru hjartanlega velkomnir að fagna með fermingarfjölskyldunni. Kaffisopi á eftir í Safnaðarheimilinu.